【特訊】英超昨晨獨角戲，曼城主場迎戰狼隊。曼城上輪打破利物浦聯賽不敗之身，今仗領隊哥迪奧拿用捷西斯正選攻堅，這名巴西鋒將亦不負所托梅開二度，帶領藍月亮三比０輕取十人應戰的狼隊。

　賽前曼城落後榜首利物浦七分，今仗當然希望全取三分，哥帥派強陣出擊，中場有大衛施華壓陣，這名西班牙中場第二百六十七次為曼城上陣，成球會於英超時代落場最多球員。曼城贏完利物浦後腳風轉順，今戰九分鐘就打開紀錄，中堅拿樸迪壓過半場傳直線，利萊辛尼走位於左路底線傳地波，捷西斯趕到輕易射入打開紀錄。十九分鐘狼隊韋利保利鞋底飛鏟貝拿度施華，球證直紅趕他出場。二十六分鐘全場最驚險場面出現，史特寧右路出波，捷西斯於兩名敵衛力壓下全速衝門，最後意外頭部狂撼門柱，即時成個跌倒，經治理後捷西斯並無大礙，可以繼續比賽。三十九分鐘史特寧於禁區內被賴恩賓納特侵犯，球證直指十二碼點，捷西斯主射破網擴大比數。

　換邊後曼城換入大將迪布尼，這名比利時猛將，六十六分鐘曾於禁區邊凌空勁抽，之後再於禁區內閃電轉身勁射被救出。但他七十八分鐘建奇功，於左路邊線起右腳處理罰球，高亞迪烏龍撞波入網，曼城贏三比０完場，同利物浦距離依然是四分。◇