張建聲食排水丸日瘦15磅 陳嘉莉怒打男友唔留力

 張建聲(Justin)在首次出任聯合監製、將於本周四(二十日)上畫的向西城市驚恐系列《作家的謊言:筆忠誘罪》中,全情瞓身演出,除了增肥二十磅扮作家「徐哲」,拍落水戲又撞崩牙外,其實他尚有幾幕戲搵身體嚟較飛,其中一場講述他被警方拉去問話,為了在外型上更頹廢,他就連食四日排水丸,令體重在一日之內輕了十五磅。

 樣殘兼減磅仲未夠,該場戲講述Justin被差佬審查,飾演差婆的Justin女友陳嘉莉(Kelly),因為激心這位作家偶像而嬲到震,問話期間先擸一本書兜頭啪Justin,跟住愈講愈激動,出手大大力推他心口,搞到坐在櫈上的Justin失重心成個撻低,頭撼地兼四腳朝天,跌得非常應棍,所以一拍完該鏡頭,Kelly和同場的趙永洪都馬上扶他起身休息。

 事後Kelly亦覺得赤,她說:「嗰日我都有提前到現場同導演度點做,我記得Justin嗰時係食緊排水丸比較虛弱,排位時同佢溝通,佢都好好,叫我用力去盡,俾我好做啲,因為佢食咗排水丸之後有一吓係個頭撞落地,都覺得唔好意思,即刻扶佢,都關心佢嘅。」

 Justin表示確有提Kelly不用手下留情:「我哋有溝通過架,叫佢俾真力,因為地下係鋪地氈,自己受傷程度會減低啲同迫真啲,畫面上都好啲,嗰日大概拍咗五個take度啦,初頭兩吓落地都震一震個頭,但ok嘅。但好得意,幾個優先場大家睇到呢幕到會笑,問番觀眾原來係笑戲入面有啲傻,啲friend就笑我哋係戲假真做,真係攞嚟發洩吓。」◇