苑瓊丹為香港娛樂圈求簽
苑瓊丹日前為香港開電視「開工大吉77」拍攝，去到「華光寺」為娛樂圈求簽，即場邀請「開運秘笈」主持蔣匡文師傅解簽，最終苑仔為香港娛樂圈求得上簽，簽文更指藝人要出國會有更好發展！苑仔就話過年未有定案，旅行之餘亦會安排登台工作，叫老公「二仔底」跟到底：「我去邊佢都要跟住我㗎啦，我地係婦唱夫隨，我地去泰國渡假囉！（避年？）唔係，之前剛去拍旅遊節目，食過啲好嘢，過年咪畀佢食餐好囉！」
苑仔笑指過年自己「大食懶」，所有家務交由家人打點：「我咪陪佢地食團年飯，佢地整好我先埋位食，食完就約腳打麻雀，呢個先係我一年最緊要嘅事！輸多贏少就唔好講啦，我都唔敢講我打幾大，怕人地會打劫我啊！」
苑仔又話自己未夠資格幫娛圈求簽，自己每年都搵高人指點迷津：「我係邊個自得㗎，邊有資格去求，年年都要搵師傅問吓點先可以化解咩劫、有咩要注意！」
同場的蔣匡文師傅就話苑仔對術數有心得，笑言二人係高手過招：「今年屬水，水旺娛樂圈，所以應該好過上年的。而今年有金有水，武打劇同電影應該會收得，而我都算到今年好多藝人會結婚，應該大家好多婚宴要去啦。」◇
