hmvod網劇《把砒霜留給自己》單元《豆花的故事》免費睇現已上架，故事講述鄭健樂開了間大隻佬豆花舖，經常騷肌賣豆花，吸引不少街坊幫襯，本來都幾好生意，但偏偏遇上惡霸收樓。飾演社團大佬的ＫＢ（李健宏）收了幾個後生仔林慧韡（達哥）及陳子豐等做靚，企圖「兇」走鄭健樂，結果竟獲神秘人打救豆花舖，仲將ＫＢ等人打到一仆一碌。

　ＫＢ平日多數拍整蠱人節目，今次飾演一個「串串貢」的江湖大佬，對他而言並不輕鬆，他說：「擺到明個人冇咩氣勢但要扮到好有氣勢，但幾好玩，真係嘗試唔同角色，比起整蠱人扮江湖大佬比較難，整蠱人都係做返自己，但做江湖大佬真係要去演，希望下次可以演得再兇神惡煞啲。」劇中ＫＢ要去九龍城一間佛堂拍收靚戲份，他覺得這是個很難忘的經歷，「嗰個地方非常香港style，間佛堂好有feel，裝修又懷舊，以前睇其他人喺呢類場景拍戲，而家可以自己喺度拍好開心，最正係可以喺嗰度做一次收靚。」

　此外，《豆花》係導演劉翁在執導的《砒霜》中最喜歡的單元，因為《砒霜》其他九個故仔都天馬行空，只得《豆花》最落地，劇情涉及香港土地問題、失業高企，題材貼地而且生活。◇