林曉峰林珊珊拍宣傳片 駕輕就熟一鏡到底

 林曉峰(阿Lo)與家姐林珊珊大女西瓜(李澄)雖然合作機會不多,但原來平常在家也會親自幫她特訓,所以這日為電視台拍攝系列式宣傳片時,就算一鏡到底也難不到他們。

 西瓜説:「阿Lo拍過呢個宣傳系列,所以駕輕就熟,而且同佢又合作過,我哋喺屋企時,佢亦試過帶住我哋一齊練習拍嘢,不過次次都俾媽咪打斷潑我冷水。但係今日都有少少壓力,因為要一鏡直落,要排練走位,好彩同阿Lo好有默契,所以呢個鏡頭一日之內拍曬,成條片都係拍咗四日半。」

 阿Lo說:「其實已經係第二次同西瓜一齊拍嘢,之前去過杜拜拍旅遊特輯,不過呢個系列嘅電視宣傳片,由第一輯我已經開始拍,今次第二輯就搵埋西瓜一齊,但係負責畫外音果位高人(Jan林海峰)就仍然係見聲唔見人。」西瓜立即插咀説:「咁第三輯一定要搵埋媽咪(林珊珊),佢應該恨咗好耐,我都好期待喺鏡頭前面話返佢『爭住睇電視』、『唔俾我煲劇』。」阿Lo和應説:「咁重有我舅父啦(狄龍)表弟啦(譚俊彥)我大佬(林海峰)都可以邀請佢哋一齊出現喺呢個屋企,咁就好啦。不過我就暫時唔會邀請曾志偉嚟加入拍攝,等佢喺果邊做耐啲先啦,聽講話新簽約嘅歌手可以自由亮相其他電視台,咁希望未來演員、工作人員都得啦,成個香港演藝圈大融和就好啦。」◇