【特訊】法國周三凌晨為歐國盃進行最後熱身，憑基斯文同基奧特包辦三個入波，主場以三比０大破保加利亞。不過法國今場大勝得不償失，主力前鋒賓森馬上半場受傷，被逼提早退下火線，據報右腳膝頭和肌肉受傷，距離首場分組賽對德國只有一星期時間下，賓森馬能否復出是一大疑問。

　賓森馬時隔六年再獲法國重召，兩場熱身賽都以正選身份掛帥，法國亦盡展強大火力，基斯文二十九分鐘以一記美妙倒掛金勾入波先開紀錄。上半場尾段，賓森馬突然痛苦坐地，雖然他一度想堅持繼續比賽，但不久就向場邊示意需要換人，離場後由軍醫治理，賓森馬一度掩面痛哭，令人擔心。

　不過賓森馬傷出未有影響法國火力，代替他的基奧特下半場大發神威，八十三分鐘門前搶點成功射成二比０，補時階段再接應賓耶達傳中攻入個人第二球，協助法國大勝三比0完場。法國連續兩場熱身賽向威爾士同保加利亞派「三蛋」，為下周三（十六日）凌晨分組賽首仗對德國注下強心針。◇