玄學家李居明曾預言七月份會是香港經濟及文化活動翻身之時，現實情況確如大師所料，香港一切趨向穩定平復中，新光戲院由七月份開始，接連推出多齣粵劇和電影，吸引大批觀眾入場，戲院重現疫情之前的興旺熱鬧。繼月初首演《共和三夢》叫好叫座，新光戲院刻下上演《毛澤東》粵劇，同樣受到熱烈捧場。

　《毛澤東》年前首演時已引起哄動，今番再度重演，李居明好高興龍貫天百忙中仍擔綱演出，更祝賀他獲得藝術家年獎，龍貫天感謝師傅近年為他創造了許多新劇新角色，尤其是有機會扮演眾多歷史人物，因參演中國近代歷史劇而自發看過好多資料、增長了歷史知識，「師傅好厲害，知道如何將史實融合在生活中，令觀眾易於接受，例如《毛澤東》一劇就有不少感情戲、愛情戲，大家都會有興趣去睇。」

　李居明為推動中國近代史教育，近年撰寫多齣現代歷史劇，創出粵劇新路向，刻下正撰寫新劇《智擒四人幫》，且已進入埋班階段，預算明年三、四月間公演。「此劇不用多説，大家都已知背景和人物，我搵咗好多資料，包括正史野史，真人真事當然也會有真相，不過爆料之餘也講分寸，我會適當地用自己那把尺去研究可寫不可寫，避開敏感之處，由觀眾自己去揣測追尋。」

　估不到劇本未出爐，已引起一場角色爭奪戰，據悉有不少女藝人聞風自薦扮演江青，李居明認同江青一角的確是全劇靈魂所在，誰能擔演都必成焦點，他表示已接觸過好幾個演員：「江青呢個角色好有挑戰性，呂珊演完川島芳子上癮，早已表示想演，TVB嘅賴慰玲年紀輕演技好，亦希望可以嘗試做粵劇，還有我老友米雪也有興趣，話自己可扮老年江青！哈哈，我覺得佢外型真係幾似江青⋯⋯不過咁多人想做，我都幾頭痕，個心十五十六，睇吓點啦！」

　目前李居明仍為新光戲院明年能否續約傾談，大業主態度很好亦傾向再合作，關鍵在於金錢問題，雙方有些差距，相信會傾出共識，若續約成功，對香港粵劇界、文化界都係好事。

　李居明表示，新光這兩年經營不易，主要是疫情影響，全世界都要面對瘟疫呢個最大困局，「即使香港搞得掂，但外圍唔掂，亦難避免受影響。希望呢一年快啲過去，虎年應該會較好，近期世界各地天災頻密，好似鄭州遭遇嘅大水災，估計未來可能仍有地震、雪、水等災害發生，世事無常，難以預料，我哋只能自己小心，珍惜家人，好好過每一天。」◇