由黎芷珊主持的《澳娛綜合呈獻：芷珊約您》，逢星期日晚上9點半翡翠台播映。周日晚播出第三集的嘉賓是組合草蜢，芷珊飛到台灣直擊他們的高雄巨蛋演唱會，成軍39年的草蜢相隔30年再於高雄開騷，三子使盡渾身解數辣爆全場，氣氛熾熱。

　高雄巨蛋演唱會完騷後，芷珊與草蜢三子蔡一智、蔡一傑和蘇志威進行深度專訪。芷珊問到三子覺得十年後的草蜢會是怎樣？蘇老闆直言不會被年齡限制思想：「歷史都係人創造，你 6、70 歲仲喺上面跳，唔係唔得㗎喎！」傑仔亦大表贊同：「唔好畀自己太多阻礙同藉口，盡做吖，將自己發揮到最好為止。」芷珊再問到他們覺得現在快樂嗎？三子異口同聲說覺得快樂，坦言入行 39 年的旅程充滿 Amazing，傑仔說：「諗番自己出道，十幾廿歲到而家，好幸運我哋幻想出來嘅嘢都成為現實，仲要做得幾好添，所以好感恩。」阿智則說：「我哋三個係屋邨仔之嘛，讀書仲係渣添啦，以前以為成功唔到㗎喇，但而家係做到 Famous喎，講緊去到邊度都有人識你喎，嗰時係幾難想像。」

　節目尾聲，草蜢三子應芷珊要求爆一個小秘密，三子大爆入行頭幾年曾有表面風光，但其實非常窮困的時期，傑仔說：「我哋開始出道攞咗新人獎，入行差唔多 7年，之後都攞咗好多獎，喺出面其實都叫幾紅，但係我哋其實仍然係好窮，嗰時仲係住緊喺屋邨，好多隔籬鄰舍會帶好多同學來睇，我哋真係冇辦法、瞓唔到覺，逼於無奈要搬出去，搬出去之後，我哋嘅錢只係夠買三張床褥，之後係咩都冇。」

　傑仔續透露好友成奎安雪中送炭的義舉，他說：「嗰時成日同大傻成奎安一齊出去玩，玩完之後佢送我返屋企，佢係都要上來屋企坐，我話唔好啦，但佢死都唔肯，最終都上咗來屋企，佢一打開門冇諗過我屋企係咁，就連一張櫈都冇，佢坐咗喺地下，佢話冇櫈坐啫，畀杯水來飲吓都得啩，我話對唔住，我屋企連雪櫃、水煲都冇，當時我哋係窮到咁，嗰個年代表面係風光，內裏其實好慘，第二日大傻搵朋友送咗張梳化來畀我，係我屋企第一張嘅梳化。」傑仔憶起故人不禁哽咽：「好多謝大傻，雖然佢已經唔喺度，但我仍然好掛住呢個人。」◇