愉景灣舉行的《The Nextwave沙灘音樂節》早前公佈演出陣容，樂迷反應熱烈，早鳥門票被秒殺搶購！主辦單位近日新增歌手名單：周殷廷，Tyson Yoshi，陳柏宇、黃妍亦將登陸沙灘音樂節舞台。

　Tyson Yoshi每次音樂節都被要求「騷肌」，佢笑言盡量滿足大家嘅「訴求」：「我想台下搵啲大隻過我嘅人上嚟，一齊睇吓啲肌肉！其實我地去海灘都尷尬，會畀人眼望望，但參加呢啲沙灘音樂節就可以大解放，大家享受舞台點狂歡都唔怕。（呢次沙灘音樂節可以抽獎送車？）仲講車？唔再講啦，抽中嘅送畀屋企人啦。」

　剛完成個唱嘅周殷廷亦成音樂節演出歌手，佢就話「小休」數日，要為演出彩排：「演唱會反應非常好，所以團隊都好緊張之後嘅演出，想放多兩日假都要取銷。」

　Jason就提議黃妍泳衣上陣，盡情享受沙灘舞台：「去沙灘唔著泳衣唔通著冷衫咩？去到海邊表演就係要盡興，唔好收收埋埋，佢係時候展示另一邊嘅魅力啦！」

　《The Nextwave沙灘音樂節》除了提升樂迷享受體驗，優化一系列措施外，呢年仲新增抽獎環節，購票觀眾均可參與抽獎，有機會獲得價值港幣$254，200Tesla Model3 Rear- Wheel Drive電動房車一部，得獎者將於六月三十日表演期間公佈，查詢及詳情請留意大會社交網站專頁。◇