唔經唔覺，奧運已舉行了十多日，已踏入最後一個禮拜，HOY專業評述團隊都各司其職，挨更抵夜為大家直播奧運不同的精彩賽事。被喻為體壇百科的資深奧運評述徐嘉樂主要與陳欣欣負責下午至晚上時段的「巴黎直擊」及「黃金直擊」環節，不須參與「深夜直播」環節，佢就為拍檔李德能加油，希望佢繼續頂到奧運閉幕禮。
李德能直播流鼻血成為網民熱話，他笑言自己沒有其他同事辛苦：「我唔需要通宵更，所以暫時仍然頂得住，會唔會有啲乜嘢送畀大家補下？冇啦!佢哋個個金錢名譽乜都有，我只能夠為佢哋加油!加油呀德能兄!」
對於中國女排八強賽輸給土耳其，嘉樂表示中國女排的五場賽事絕對是非常刺激及緊湊：「雖然中國唔能夠進入四強，但都覺得佢哋表演得好好，但當中嘅朱婷有好多新傷舊患，所以都影響咗臨場嘅表現，而土耳其嘅華加絲真係非常之厲害，係非常之難應付嘅對手，所以呢一場比賽非常之精彩。」這場比賽將會是朱婷最後一場參與奧運的賽事，嘉樂就覺得對方仍然不會退役，因為還有很多其他國家的排球隊都很想得到她的加盟。
Patrick吳毅豪是另一位全能主持，由下午到深夜的直播都見到佢嘅蹤影，甚至轉個頭又見佢同Alice曾琸庭數「金牌榜」，Patrick坦然感覺疲累：「我係覺得勁攰嘅，但係又忍唔住收廠之後，返到屋企都繼續睇直播，因為奧運實就太精彩!唔好睇我好似好精神咁樣，個黑眼圈黑到不能再黑，全靠化妝師嘅巧奪天工咋！講到拍檔李德能做直播時流鼻血，Patrick表示要媽咪煲些紅棗水給對方補一下。
另外對於江旻憓退役後不久立即宣佈加入馬會做對外事務助理經理，Patrick都覺得好震驚：「講真我真係覺得好突然！因為由Vivian攞奧運金牌，宣佈退役，到加入馬會，都係一個好短嘅時間，但知道對方都好熱愛公益嘅事務，呢份工作應該好啱佢，所以都非常恭喜佢！」◇
