「致敬詞聖盧國沾作品演唱會」前(七日)晚於紅磡體育館完成，一眾表演嘉賓包括葉振棠、徐小明、羅嘉良、呂珊、李龍基、張德蘭、米雪、溫兆倫、雷安娜、蔣志光、麥潔文、黃寶欣、羅敏莊、張與辰和劉洋以沾Sir的經典金曲向他致敬。
打頭陣的張德蘭以一曲《相識也是緣份》為全晚演唱會揭開了序幕，之後她說：「我知道佢今晚佢嘅女女喺度，盧太亦都喺後台聽我哋唱歌，我想借呢個機會除咗多謝盧生，亦都要多謝盧太，因為佢一直都畀好多支持同埋佢好愛盧生。」德蘭說：「真係好掛住佢，跟住我唱嘅歌可以話改變咗我嘅歌唱事業，因為呢首歌係盧生第一首寫俾我嘅電視劇插曲，《鮮花滿月樓》」接著的李龍基獻唱了《陸小鳳》和《浣花洗劍錄》；呂珊先唱出《每當變幻時》，珊姐說：「隻隻歌我都想唱，大家平時應該好少見到我着晚裝，今晚可以同咁好嘅樂團一齊合作，跟住送畀大家嘅呢首歌都係由細唱到大，呢首就係《神鳳》。」
葉振棠出場先唱出《大內群英》，棠哥說：「多謝大家對盧Sir嘅支持，其實我自己當年好幸運，因為我加入麗的電視之後就一口氣可以唱咗六套劇嘅主題曲同插曲，呢啲主題曲同插曲都係盧Sir嘅作品，我非常非常多謝盧Sir對我嘅愛戴，但係大會同我講雖然我自己有咁多首盧Sir嘅靚歌，但我只可以揀兩首，不過我要唱三首，我問點解呢？佢哋話我要代表Michael Kwan向盧Sir致敬，各位朋友《天蠶變》」；久違的黃寶欣獻唱了《驟雨中的陽光》和她當年參加第四屆新秀歌唱比賽時的作品《我為你狂》。
羅嘉良從升降台出現在大家眼前唱出《秦始皇》，之後他說：「盧國沾先生寫咗咁多膾炙人口嘅歌曲，令到我哋留下咗咁多美好嘅回憶，我喺一九八四年參加新秀歌唱比賽嗰陣認識盧生，當時佢第一次見到我，我亦都係第一次見到佢，眨下眼已經四十一年，我非常多謝我嘅恩人盧國沾先生，因為如果冇佢就唔會有我羅嘉良，我相信大家都會永遠懷念盧生，我好開心成為佢嘅徒弟，跟住我要送畀大家盧生一首非常出名嘅歌曲，亦都係一首電視劇嘅主題曲，大家頭先開場嘅時候呢首歌就已經響起，送畀大家，《殘夢》」。接着雷安娜先後唱出《明日話今天》和《願君真愛不相欺》，她更找來蔣志光和她合唱《人在旅途灑淚時》，之後蔣志光再唱了《漁舟唱晚》及《大地恩情》。
中年好聲音三的張與辰先出場唱《決戰前夕》，劉洋緊接出場唱《雪中情》，之後他們兩人合唱《傲骨》。壓軸出場的溫兆倫先唱出《隨緣》，Derek說：「好榮幸可以來到今晚紅館呢個舞台，我哋可以一齊向盧國沾先生致敬嘅同時，我哋唔可以忘記一件事，一個成功男人嘅背後一定有一個好好嘅女人支持佢，同唔同意呀？所以大家要對老婆好啲。」Derek在唱畢《今生無悔》後，便聯同其他歌手大合唱《前程錦繡》，為「致敬詞聖盧國沾作品演唱會」畫上了句號。◇
